FATAWAR IBNU TAIMIYYA (R) TA FIFITA KHALIFAN ANNABI (SAW) NA FARKO; ABUBAKAR (RA) A KAN SAURAN SAHABBAI. KASHI NA (2)

BISMILLAHIR RAHMANIR RAHIM.

IBNU TAIMIYYA (R) YA CI GABA DA CEWA:  

HAKA NAN FA'DINSA (SAW) GAME DA ALIYU (RA): 

((لأعطين الراية غدا رجلا يحبه الله ورسوله ويحب الله ورسوله)) 

GOBE ZAN BA DA TUTA MA WANI MUTUMIN DA YAKE SON ALLAH DA MANZONSA, KUMA ALLAH DA MANZONSA SUKE SONSA. 

YANA DAGA CIKIN HADISAI MAFI INGANCI, SHI NE MA HADISI MAFI INGANCI WANDA AKA RUWAITO A FALALOLIN ALIYU (RA), BUKHARI DA MUSLIM NE SUKA RUWAITO SHI. 

AMMA WANI MAK'ARYACI YA YI K'ARI A CIKINSA, YA CE:

 ((إن الراية أخذها أبو بكر وعمر فهربا)) 

-WAI- ABUBAKAR DA UMAR SUN KAR'BI TUTAR AMMA SAI SUKA TSERE A FILIN YAK'IN. (ALLAH WADAI DA MAHASSADA). 

YA ZO A CIKIN SAHIHIN HADISI; A LOKACIN DA ANNABI (SAW) YA CE: 

 ((لأعطين الراية رجلا)) قال عمر: (( ما أحببت الإمارة إلا يومئذٍ )) 

''ZAN BA DA TUTA MA WANI MUTUM''. SAI UMAR YA CE: ''BAN TA'BA SON SHUGABANCI BA SAI WANNAR RANAR''.

SAI UMAR DA WANINSA SUKA NUNA KANSU DON NEMAN A BA SU TUTAR. TO, DA YA TSEREN NE AI DA BAI NUNA KANSA DON A BA SHI BA. 

WANNAN HADISIN RADDI NE WA NASIBAI MASU ZAGIN ALIYU (RA), ALLAH WADAI DA SU. SABODA SHI MUMINI NE TAK'IYYI (MAI TAK'AWA) YANA SON ALLAH DA MANZONSA, KUMA ALLAH DA MANZONSA SUNA SONSA. SAI DAI WANNAN BA YA DAGA CIKIN FALALOLINSA DA YA KE'BANTA DA SU (KHASWA'IS). SABODA KOWANE MUMINI MAI CIKAKKEN IMANI YANA SON ALLAH DA MANZONSA, KUMA ALLAH DA MANZONSA SUNA SONSA. ALLAH YA CE: 

 { فسوف يأتي الله بقوم يحبهم ويحبونه } 

''DA SANNU ALLAH ZAI KAWO WASU MUTANE YANA SONSU, SUNA SONSA''. 

WA'DANNAN MUTANE KUWA SU NE WA'DANDA SUKA YAK'I MASU RIDDA, SHUGABANSU KUWA SHI NE ABUBAKAR (RA). 

YA ZO A CIKIN SAHIHIN HADISI; ANNABI (SAW) YA FA'DI MA AL- ANSAR (MUTANEN MADINA): 

 ((والله إني لأحبكم)) 

''WALLAHI INA SONKU''. 

YA ZO A SAHIHIN HADISI; AMRU 'DAN ASW (RA) YA TAMBAYE SHI (SAW):

 أي الناس أحبّ إليك؟ قال: ((عائشة)) قال: فمن الرجال؟ قال: ((أبوها))

''WA KA FI SO A CIKIN MUTANE? SAI YA CE: ''A'ISHA''. SAI YA CE: A MAZA? SAI YA CE: ''BABANTA''.

A CIKIN WANNAN HADISIN AKWAI TABBATAR DA CEWA; ANNABI (SAW) YA FI SON ABUBAKAR (RA) FIYE DA KOWA A MAZA. WANNAN KUWA YANA DAGA CIKIN KE'BANTATTUN FALALOLIN ABUBAKAR (RA) (KHASWA'IS). 

(WATO, ANNABI (SAW) YANA SON ALIYU (RA), AMMA YA FI SON ABUBAKAR (RA) A KAN DUKKAN SAHABBANSA). 

SA'ANNAN USAMA BIN ZAID (RA) ANA KIRANSA DA; MASOYIN ANNABI (SAW) 'DAN MASOYIN ANNABI (SAW), SHI DA BABANSA. DA SAURAN IRIN WA'DANNAN NASSOSHI DA SUKE BAYYANA CEWA; BA KOWANE MUTUM NE DA AKA SANI ALLAH DA MANZONSA SUNA SONSA, KUMA YANA SON ALLAH DA MANZONSA, YA ZAMA DOLE SHI NE FIYAYYEN HALITTA BA. SABODA IRIN WANNAR SIFA TA TABBATA GA MUTANE MASU YAWA. DON HAKA WANNAN BA YA DAGA CIKIN KE'BANTATTUN FALALOLIN MUTUM MU'AYYANI GUDA 'DAYA. 

AMMA FA'DINSA (SAW) MA ALIYU (RA): 

((أما ترضى أن تكون مني بمنزلة هارون من موسى)) 

''BA ZA KA YARDA KA ZAMA MATSAYINKA A WAJENA KAMAR MATSAYIN HARUNA NE A WAJEN MUSA BA''. 

HADISI NE INGANTACCE. WANNAN YA FA'DE SHI NE A YAK'IN TABUKA, A LOKACIN DA YA BA SHI WAKILCIN MADINA, SAI WASU MUTANE SUKA AIBANTA SHI, SUKA CE: ANNABI (SAW) YA WAKILTA SHI NE SABODA YANA K'INSA. ALHALI ANNABI (SAW) YA KASANCE IDAN ZAI YI TAFIYA YA BAR MADINA, YA KAN WAKILTA WANI MUTUM DAGA CIKIN SAHABBANSA. KUMA YA KASANCE AKWAI WASU MAZAJE MUMINAI A MADINAN WA'DANDA SUKE K'ARK'ASHINSA. AMMA A SHEKARAN YAK'IN TABUKA, ANNABI (SAW) BAI YI IZNI MA WANI DAGA CIKIN MUMINAI MASU IKON ZUWA YAK'I DA SU ZAUNA A MADINA BA. DON HAKA BABU WANI WANDA YA ZAUNA BA TARE DA WANI UZURI BA, SAI DAI WANDA YA SA'BA MA ALLAH DA MANZONSA. DON HAKA WANNAN SAI YA ZAMA (WAKILCIN ALIYU (RA) A MADINA WAKILCI NE MAI RAUNI. (SABODA BABU WANI NAMIJI A K'ARK'ASHIN WAKILCIN NASA). DON HAKA SAI MUNAFUKAI SUKA AIBANTA SHI DA HAKAN. SAI ANNABI (SAW) YA BAYYANA CEWA; BA NA WAKILTAKA A MADINA BA NE, DON BA KA DA WANI MATSAYI A WAJENA, SABODA ANNABI MUSA (AS) YA WAKILTA HARUNA (AS), ALHALI HARUNA (AS) YA YI TARAYYA DA SHI A CIKIN MANZANCI. DON HAKA BA ZA KA YARDA KA ZAMA MATSAYINKA A WAJENA KAMAR MATSAYIN HARUNA NE A WAJEN MUSA BA, SAI KA WAKILCENI A CIKIN IYALAINA KAMAR YADDA HARUNA (AS) YA WAKILCI 'DAN UWANSA MUSA (AS). 

KUMA SANANNE NE; ANNABI (SAW) YA WAKILTA WANIN ALIYU (RA) A MADINA KAFINSA. WA'DANCAN MA SUNA DA IRIN WANNAN MATSAYIN NE A WAJENSA (SAW). DON HAKA WANNAN BA YA DAGA CIKIN FALALOLIN ALIYU (RA) WANDA YA KE'BANTA DA SHI. 

DA A CE; WANNAN WAKILCIN YA FI SAURAN WAKILCIN DA ANNABI (SAW) YA YI, DA ALIYU (RA) BAI JI TSORON HAKAN BA, DA BAI FITA YA BI ANNABI (SAW) YANA YIN KUKA BA,YANA CEWA: 

 (( أتخلفني في النساء والصبيان )) 

ZA KA TAFI KA BAR NI A CIKIN MATA DA YARA?!

KUMA YANA DAGA CIKIN ABIN DA ZAI BAYYANA WANNAN, CEWA; A BAYAN WANNAN WAKILCIN ALIYU (RA), ANNABI (SAW) YA NA'DA ABUBAKAR (RA) A SHEKARA TA 9 (AMIRUL HAJJI). SABODA WANNAN WAKILCIN ALIYU (RA) YA KASANCE NE A YAK'IN TABUKA A FARKONSA. AMMA DA YA DAWO DAGA YAK'IN SAI YA NA'DA ABUBAKAR (RA) AMIRUL HAJJI. SA'ANNAN SAI YA BI BAYANSA DA ALIYU (RA), DA ALIYU (RA) YA ISA WAJEN ABUBAKAR (RA), SAI ABUBAKAR (RA) YA CE:

 (( أميرٌ أو مأمور )) 

KAI SHUGABA NE KO MABIYI? 

SAI ALIYU (RA) YA CE: 

(( بل مأمور )) 

A'A, MABIYI NE. 

(DUBA WANNAN A CIKIN SUNANU AL- NASA'IY: 

 كتاب الحج، باب الخطبة قبل يوم التروية 5/247 رقم 2993) 

KUMA ABUBAKAR (RA) YA KASANCE SHI YAKE JAN SALLAH MA ALIYU (RA) DA WANINSA (A LOKACIN AIKIN HAJJIN). KUMA YANA SHUGABANTAR ALIYU (RA) DA SAURAN SAHABBAI, KUMA SUNA YI MA ABUBAKAR (RA) 'DIN 'DA'A. ALIYU (RA) KUMA YA 'DAUKI YANKE ALK'AWURAN DA SUKE TSAKANIN ANNABI (SAW) DA MUSHRIKAI. SABADA A AL'ADANCE, BA MAI K'ULLA ALKAWARI KO WARWARE SHI SAI MUTUMIN DA YAKE DAGA AHLIN GIDANSA. SHI YA SA ANNABI (SAW) YA CE: 

((لا يبلغ عني العهد إلا رجل من أهل بيتي)) 

BA MAI ISAR MINI DA WANI ALKAWARI SAI MUTUM DAGA AHLIN GIDANA. 

WANNAN SABODA HAKA SUKA SABA A AL'ADANCE. 

WANNAN BA YA DAGA CIKIN KE'BANTATTUN FALALOLI NA ALIYU (RA), SABODA KOWA DAGA CIKIN AHLIN GIDAN ANNABI (SAW) IN YA YANKE ALKAWARIN BUK'ATA TA BIYA. SAI DAI SHI ALIYU (RA) SHI NE MAFIFICIN BANU HASHIM BAYAN MANZON ALLAH (SAW). DON HAKA SHI YA FI CANCANTAR ANNABI (SAW) YA GABATAR DA SHI, A KAN SAURAN DANGINSA. 

TO, A YAYIN DA ANNABI (SAW) YA SHUGABANTAR DA ABUBAKAR (RA) A KAN ALIYU (RA), BAYAN YA FA'DI WANNAN HADISIN: 

((أما ترضى أن تكون مني بمنزلة هارون من موسى)) 

''BA ZA KA YARDA KA ZAMA MATSAYINKA A WAJENA KAMAR MATSAYIN HARUNA NE A WAJEN MUSA BA''. 

SAI MUKA SAN CEWA; BABU WANI DALILI A CIKINSA A KAN CEWA; ALIYU (RA) YANA MATSAYIN HARUNA NE TA KOWACE FISKA. SABODA DA HAKA NE, DA BAI GABATAR DA ABUBAKAR (RA) A KANSA BA; A HAJJI NE KO A SALLAH. KAMAR YADDA SHI HARUNA (AS) MUSA BA ZAI GABATAR DA WANI A KANSA BA. KAWAI ANNABI (SAW) YA KAMANTA ALIYU (RA) DA HARUNA (AS) NE TA WAJEN WAKILCI KAWAI. WANNAN KUWA ABU NE DA YAKE WANIN ALIYU (RA) YA YI TARAYYA DA SHI A CIKINSA. 

A CIKIN HADISI INGANTACCE; ANNABI (SAW) YA KAMANTA ABUBAKAR (RA) DA ANNABI IBRAHIM (AS) DA ANNABI ISA (AS). YA KAMANTA UMAR (RA) DA ANNABI NUHU (AS) DA ANNABI MUSA (AS), A LOKACIN DA SUKA BA SHI SHAWARA A KAN FURSUNONIN YAK'IN BADAR. WANNAN YA BA DA SHAWARAR SU FANSHI KAWUKANSU, WANNAN KUMA YA BA DA SHAWARAR A KASHESU. WANNAN KAMANTAWAN; KAMANTA ABUBAKAR (RA) DA ANNABI IBRAHIM (AS) DA ANNABI ISA (AS), DA KAMANTA UMAR (RA) DA ANNABI NUHU (AS) DA ANNABI MUSA (AS) KUWA, YA FI NA KAMANTA ALIYU (RA) DA ANNABI HARUNA (AS). AMMA HAKAN BAI SA SUN ZAMA KAMAR WA'DANCAN MANZANNIN BA KAI TSAYE. SAI DAI SUN YI KAMA DA MANZANNI; WANNAN A WAJEN SASSAUCI SABODA ALLAH, WANNAN KUMA A WAJEN TSANANI SABODA ALLAH.

KAMANTA ABU DA ABU SABODA KAMANCINSA DA SHI A WASU FISKOKI, YANA DA YAWA A CIKIN LITTAFIN ALLAH DA SUNNAR ANNABI (SAW) DA YAREN LARABCI. 

KU BIYOMU AKWAI CIGABA...

ALLAH YA SA MU DACE.